പുഴയൊഴുകിയ വഴിയാകെ ഇതളുകളായിരുന്നു,
നിറംവാര്ന്നു പടരുന്നയിതളുകള്.
ഒഴുകിവന്നു വേരുപിടിച്ച പേരറിയാച്ചെടിയുടെ
മണമില്ലാപ്പൂക്കളുടെ നേര്ത്ത മഞ്ഞയിതളുകള്
ഒരിക്കലുമിലകൊഴിയാത്ത, എന്നും പൂവിട്ടു പൊഴിക്കുന്ന,
പരദേശിച്ചെടിയുടെ പരാഗമില്ലാപ്പൂക്കള്.
ഉടലാകെപ്പടര്ന്ന നിറമുള്ള വെള്ളം,
ഉടലാകെപ്പടര്ന്ന നിറമുള്ള വെള്ളം,
എക്കലിനും പായല്പ്പച്ചയ്ക്കും മീതെ,
ധൃതിയേതുമില്ലാതെ, എന്നാല് നിലയ്ക്കാതെ
കരയോടുകരതൊട്ട് ഒഴുകുന്നു .
കുളവാഴവേരിലെ കൊതുകുകള് മഞ്ഞ,
വരാലിന്നിത്തിരിക്കുഞ്ഞുങ്ങള് മഞ്ഞ,
കണ്ടുകൊതിതീരാത്ത മാനവും,
ഉള്ളുപൊട്ടിക്കരഞ്ഞ കണ്ണീരും മഞ്ഞ
പിത്തമല്ലുന്മാദമെന്നു ഭയന്നു ചിറകൊതുക്കിയെ-
ന്നിണതന്നുടലു പറ്റി നില്ക്കവേ
നിന്റെ മാനമിതിന്നാഴത്തിലെന്നു ചൊല്ലാറുള്ള
കണ്കളുടെ നീലിമയെന്നോടു ചിരിച്ചു, ഒരു മഞ്ഞച്ചിരി.
